ඉන්දියාවට එරෙහිව බංග්ලාදේශයට සුපිරි ජයක්..

COLOMBO (News 1st) – 2023 ආසියානු කුසලාන ක්‍රිකට් තරගාවලියේ සුපිරි සිව්දෙනාගේ වටයේ බංග්ලාදේශ කණ්ඩායමට එරෙහි තරගයේදී ඉන්දීය කණ්ඩායම ලකුණු 6කින් පරාජයට පත් විය. 

කොළඹ ආර් ප්‍රේමදාස ක්‍රීඩාංගණයේ පැවැති තරගයේ පළමුව පන්දුවට පහරදුන් බංග්ලාදේශ කණ්ඩායමේ පළමු කඩුලු 4 බිද වැටුණේ ලකුණු 59කදී ය.

ඉන් අනතුරුව පිටියට එක් වු නායක ශකීබ් අල් හසන් සහ ටව්හිද් හ්රිඩෝයි පස්වන කඩුල්ලට ලකුණු 101ක සබදතාවක් ගොඩනැගුවේ ය.

ටව්හිද් හ්රිඩෝයි ලකුණු 54කි.

බංග්ලාදේශ නායක ශකීබ් අල් හසන් ලකුණු 80ක් රැස් කළේ ය.

ඒ අනුව ඔවුන් නියමිත පන්දුවාර 50 අවසානයේ කඩුලු 8ක් දැවී රැස් කළ ලකුණු සංඛ්‍යාව 265කි.

පිළිතුරු ඉනිම ක්‍රීඩා කළ ඉන්දීය කණ්ඩායමට සියලු දෙනා දැවී රැස් කිරීමට හැකි වුයේ ලකුණු 259ක් පමණි.

ශුබ්මන් ගිල් සිය එක්දින පිටියේ සිව්වන ශතකය ද සමගින් ලකුණු 121ක් රැස් කළේ ය.

මේ අතර, මෙවර ආසියානු කුසලාන ක්‍රිකට් තරගාවලියේ අවසන් මහා තරගය ශ්‍රී ලංකාව සහ ඉන්දියාව අතර හෙට(17) පැවැත්වීමට නියමිතයි.

එම තරගය සවස 3 සිට තරගාවලියේ නිල දේශීය විකාශන අයිතිය හිමි TV 1 නාලිකාව ඔස්සේත්, WWW.SIRASATV.LK  නිල වෙබ් අඩවිය හරහාත් ඔබට නැරඹිය හැකි ය.