මැතිවරණ නීති කඩන රාජ්‍ය ආයතන නිරීක්ෂණයට විශේෂ කණ්ඩායම්... මැතිවරණ කොමිසමෙන් තීරණයක්...

COLOMBO (News 1st) - මැතිවරණ නීති උල්ලංඝණය කරමින් කටයුතු කරන රාජ්‍ය ආයතන සම්බන්ධයෙන් සොයා බැලීමට විශේෂ නිලධාරී කණ්ඩායම් යොමු කිරීමට පියවර ගන්නා බව ජාතික මැතිවරණ කොමිෂන් සභාව පවසයි.

එම කොමිසම සඳහන් කළේ, ඇතැම් රාජ්‍ය දෙපාර්තමේන්තු හා රාජ්‍ය ආයතන මැතිවරණ නීති උල්ලංඝණය කරන බවට පැමිණිලි ලැබෙමින් ඇති බවයි.

ඒවා නතර කරන ලෙසට දුන් උපදෙස් ක්‍රියාත්මක නොකරන අවස්ථාවලදී අදාළ කණ්ඩායම් යොමු කර තත්ත්වය සොයා බලා පාලනය  කරනු ඇති.

මේ අතර මැතිවරණ නීතී උල්ලංඝණය කරමින් කටයුතු කළ අමාත්‍යාංශ දෙකක ලේකම්වරුන් මැතිවරණ කොමිසමට කැඳවා කරුණු විමසූ බව ද එම කොමිසම පැවසීය.

මැතිවරණ කොමිසම පැවසුවේ, ජනාධිපතිවරණයට අදාළව රාජ්‍ය නිලධාරීන් කටයුතු කළ යුතු ආකාරය සම්බන්ධයෙන් නිකුත් කළ චක්‍රලේඛයට අනුව සියලු රාජ්‍ය නිලධාරීන් කටයුතු කළ යුතු බවයි.

එසේ නොකරන නිලධාරීන්ට එරෙහිව දැඩි පියවර ගන්නා බව ද මැතිවරණ කොමිසම පැවසීය.