දකුණු අප්‍රිකා හිටපු ජනපති තාබෝ ම්බෙකිගේ ප්‍රධානත්වයෙන් කැපිටල් මහරාජා සමූහයේ වාර්ෂික සමුළුව අද පස්වරුවේ

COLOMBO (News1st) - කැපිටල් මහරාජා සමූහයේ වාර්ෂික සමුළුව අද(27) පස්වරුවේ රත්මලාන Stein Studios හිදී පැවැත්වෙයි.

එහි ප්‍රධාන ආරාධිතයා ලෙස සහභාගී වන්නේ, දකුණු අප්‍රිකාවේ දෙවැනි ප්‍රජාතන්ත්‍රවාදී ජනාධිපතිවරයා මෙන්ම අප්‍රිකානු කලාපයේ කෘතහස්ථ දේශපාලන නායකයෙකු වන තාබෝ ම්බෙකි මහතායි.

තාබෝ ම්බෙකි මහතා ඊයේ පෙරවරුවේ දිවයිනට පැමිණියේ ය.

කටුනායක ජාත්‍යන්තර ගුවන් තොටුපලේදී ඔහු පිළිගනු ලැබුවේ, බස්නාහිර පළාත් ආණ්ඩුකාර හනීෆ් යුස්ෆ් , ශ්‍රී ලංකාවේ දකුණු අප්‍රිකානු මහකොමසාරිස් සැන්ඩිල් එඩ්වින් ෂාල්ක් සහ කැපිටල් මහරාජා සමුහයේ සමුහ අධ්‍යක්ෂ ශෙවාන් ඩැනියල් යන මහත්වරු ඇතුළු පිරිසක් විසින් ය.

කැපිටල් මහරාජා සමූහයේ වාර්ෂික සමුළුවේදී තාබෝ ම්බෙකි මහතා විශේෂ දේශනයක්ද පවත්වනු ඇති.

ඔහු මෙරට රැදී සිටින කාලය තුළ කොළඹදී තරුණ ව්‍යවසායකයින් හා ව්‍යාපාරික නායකයින් හමුවීමට ද නියමිතව තිබේ.

සති අන්තයේ තාබෝ ම්බෙකි මහතා ගම්මැද්ද වැඩසටහන සමගද එක්වෙයි.