බැකෝ සමන්ගේ බිරිඳගෙන් CIDය ප්‍රශ්න කිරීම අරඹයි.....

COLOMBO(News1st) - අපරාධ පරීක්ෂණ දෙපාර්තමේන්තුව භාරයට ගත් බැකෝ සමන්ගේ බිරිදගෙන් ප්‍රශ්න කිරීම ආරම්භ කර තිබේ.

කටුනායක ජාත්‍යන්තර ගුවන් තොටුපලේදී ඇය සහ ඇගේ දරුවා ඊයේ(29) පස්වරුවේ අපරාධ පරීක්ෂණ දෙපාර්තමේන්තුව භාරයට ගැනුණි.

ඒ, ඉන්දුනීසියාවේදී අත්අඩංගුවට ගෙන මෙරටට පිටුවහල් කිරීමෙන් අනතුරුවයි.

මේ අතර ඇය සමග අත්අඩංගුවට පත්වූ කෙහෙලිබද්දර පද්මේ ඇතුළු සංවිධානාත්මක අපරාධ කල්ලි සාමාජිකයින් 06 දෙනා හෙට(31) දිනයේ මෙරටට රැගෙන ඒමට සැලසුම් කර ඇති බව පොලීසිය සඳහන් කළේ ය.

ඒ සඳහා විශේෂ නිලධාරීන් කණ්ඩායමක් අද(30) ඉන්දුනීසියාව බලා පිටත්ව යාමට නියමිතව තිබේ.

ඉන්දුනීසියාවේ ජකර්තා නුවරට ආසන්න ප්‍රදේශයකදී කෙහෙල්බද්දර පද්මේ, කමාන්ඩෝ සලින්ත, බැකෝ සමන්,  පානදුරේ නිලංග හා තැඹිලි ලහිරු යන සංවිධානාත්මක අපරාධකරුවන් අත්අඩංගුවට පත්වුනේ ශ්‍රී ලංකා පොලීසිය ඉන්දුනීසියානු පොලීසිය හා ජාත්‍යන්තර පොලීසිය ඒකාබද්ධව කල මෙහෙයුමකදී.