ශෂී වීරවංශට මොකද වෙන්නේ ? වසර 2ක සිර දඬුවම මහාධිකරණය ස්ථිර කරයි

COLOMBO (News 1st) - විමල් වීරවංශගේ බිරිඳ රණසිංහ මුදියන්සේලාගේ ශිර්ජා උදයන්ති හෙවත් ශෂී වීරවංශ ඇයට පනවා තිබූ වසර දෙකක සිරදඩුවම හා දඩයෙන් නිදොස් කොට නිදහස් කරන්නැයි ඉල්ලා ඉදිරිපත් කළ අභියාචනා පෙත්සම කොළඹ මහාධිකරණය අද ප්‍රතික්ෂේප කළේ ය.

අවිධිමත් රාජ්‍යතාන්ත්‍රික විදේශ ගමන් බලපත්‍රයක් සන්තකයේ තබා ගැනීමේ චෝදනා වලට වරදකරුවූ ඇයට කොළඹ මහේස්ත්‍රාත් අධිකරණය මෙම දඩුවම නියම කර තිබුණි.

2010 ඔක්තෝබර් මස 13 දින ව්‍යාජ උප්පැන්නයක් ඇතුළු ලේඛන සහිත ඉල්ලුම්පත්‍රයක් ඉදිරිපත් කර ඇය මෙම ගමන් බලපත්‍රය ලබාගෙන තිබුණි.

ශෂී වීරවංශගේ සැමියා වූ විමල් වීරවංශ එවක මහින්ද රාජපක්ෂ රජයේ ඉදිකිරීම්, ඉංජිනේරු සේවා, නිවාස හා පොදු පහසුකම් අමාත්‍යවරයායි.