ඊශ්‍රායලය එල්ල කරන ඕනෑම ප්‍රහාරයකට ප්‍රතිචාර දැක්වීමට සූදානම් - ඉරාන ජනපතිගෙන් ප්‍රකාශයක්...

COLOMBO(News 1st )-ලෙබනනයේ බේරුට් අගනුවර ජාත්‍යන්තර ගුවන්තොටුපොළ ආසන්නයට ඊශ්‍රායලය අද (04) අලුයම ප්‍රහාරයක් කළේ ය.

ඉන් සිදුවූ බලපෑම සම්බන්ධයෙන් මෙතෙක් නිශ්චිත තොරතුරු වාර්තා වී නැහැ.

පසුගිය සති කිහිපය තුල ඊශ්‍රායලය එල්ල කළ ප්‍රහාර හමුවේ ලෙබනනයේ පුද්ගලයින් ලක්ෂ 12කට වැඩි පිරිසක් අවතැන් වී තිබේ.  

මියගිය පුද්ගලයින් සංඛ්‍යාව 2000කට ආසන්නයි.

මේ අතර, ඊශ්‍රයලය එල්ල කරන ඕනෑම ප්‍රහාරයකට ප්‍රතිචාර දැක්වීමට සූදානම් බව ඉරාන ජනපති මසුඩ් පෙසෙෂ්-කියන් පවසයි.  

ඕනෑම ආකාරයේ මිලිටරි ප්‍රහාරයකට, හෝ ත්‍රස්තවාදී ක්‍රියාවකට ඉරාන සන්නද්ධ හමුදාවන් විසින් සුදුසු පරිදි ප්‍රතිචාර දක්වනු ඇතැයි ඔහු අවධාරණය කළේ ය.

ජනාධිපතිවරයා මේ බව සඳහන් කළේ, ඉරානය වන්දි ගෙවනු ඇති බවට ඊශ්‍රායල අග්‍රාමාත්‍ය බෙන්ජමින් නෙතන්යාහු ලබාදුන් ප්‍රතිඥාවකට පිළිතුරු දෙමින් ය.

ඉරානය ඉකුත් අගහරුවාදා ඊශ්‍රායලය ඉලක්ක කරගනිමින් එල්ල කල මිසයිල ප්‍රහාරයෙන් කිසිදු ජීවිත හානියක් වාර්තා වූයේ නැහැ.

අයන් ඩෝම් සහ ඇරෝ ඇතුළු ඊශ්‍රායලයේ ගුවන් ආරක්ෂණ පද්ධතිය ඉරාන මිසයිල විනාශ කර දැමූ අතර ඊට අමෙරිකාවේ සහ බ්‍රිතාන්‍යයේද සහය හිමි විය.