ජනපති ඩොනල්ඩ් ට්‍රම්ප් පැනවූ බොහෝ තීරුබදු නීති විරෝධී බව අම‍ෙරිකානු අභියාචනාධිකරණයක් තීන්දු කරයි.- විදෙස් මාධ්‍ය

COLOMBO(News1st) - අම‍ෙරිකානු ජනාධිපති ඩොනල්ඩ් ට්‍රම්ප් විසින් පනවන ලද බොහෝ තීරුබදු නීතිවිරෝධී බව අම‍ෙරිකානු අභියාචනාධිකරණයක් තීන්දු කර තිබේ.

විදෙස් මාධ්‍ය වාර්තා කළේ, රටවලට පැනවූ තීරුබදු ට්‍රම්ප්ගේ බලය ඉක්මවා යාමක් බව අභියාචනාධිකරණ විනිසුරුවරයා සඳහන් කර ඇති බවයි.

බදු සහ තීරුබදු අය කිරීමට බලය ඇත්තේ කොංග්‍රසයට පමණක් බවද අභියාචනාධිකරණය පවසා තිබේ.

මෙම තීන්දුව ට්‍රම්ප්ගේ අන්‍යෝන්‍ය තීරුබදුවලට බලපාන අතර එය චීනය, මෙක්සිකෝව සහ කැනඩාව ඇතුළු ලොව පුරා බොහෝ රටවල් මත පනවා ඇති තීරුබදු වලටද බලපානු ඇතැයි සඳහන් වේ.

එහෙත් මේ පිළිබඳ ශ්‍රේෂ්ඨාධිකරණයෙන් විමසීමට ට්‍රම්ප් පරිපාලනයට කාලය ලබා දීම සඳහා ඔක්තෝබර් 14 වන දින දක්වා අභියාචනාධිකරණ තීන්දුව ක්‍රියාත්මක නොවන බව ද විදෙස් මාධ්‍ය වාර්තා කළේ ය.

ඩොනල්ඩ් ට්‍රම්ප් අභියාචනාධිකරණ තීන්දුව විවේචනය කරමින් පැවසුවේ, මෙය ඉදිරියට යාමට ඉඩ දුන්නොත්, එම තීරණය  ඇමරිකා එක්සත් ජනපදය විනාශ කරනු ඇති බවයි.

පක්ෂග්‍රාහී අභියාචනාධිකරණයක් තීරුබදු ඉවත් කළ යුතු බවට ප්‍රකාශ කලද අවසානයේ ඇමරිකා එක්සත් ජනපදය ජයග්‍රහණය කරන බව ද ඇමරිකානු ජනාධිපතිවරයා පවසයි.

එම තීරුබදු කෙදිනක හෝ ඉවත් කළහොත්, එය රටට සම්පූර්ණ ව්‍යසනයක් වනු ඇතැයිද ට්‍රම්ප් පවසයි.