අමෙරිකාවට ආනයනය කරන සියලු භාණ්ඩ සඳහා 10% තීරු බද්දක්..

COLOMBO (News 1st) - අමෙරිකාවට ආනයනය කරන සියලුම භාණ්ඩ සඳහා 10% ක මූලික තීරුබද්දක් පැනවීමට ජනාධිපති ඩොනල්ඩ් ට්‍රම්ප් තීරණය කර තිබේ.

ඒ අනුව රටවල් 100 කට පමණ පනවා ඇති මූලික තීරුබදු අ‍ප්‍රේල් 5 වැනිදා සිට ක්‍රියාත්මකයි.

ජනාධිපතිවරයාගේ තීරණයත් සමග තවත් රටවල් 60 කට  10%කට අධික තීරුබදු අගයක් පැනවේ.

විදෙස් මාධ්‍ය වාර්තා කළේ, ඒ අතරින් ඇතැම් රටවලට සියයට 50 ක් පමණ වන ඉහළ තීරු බද්දක් පැනවෙන බවයි.

එය ක්‍රියාත්මක වන්නේ අප්‍රේල් 9 වැනිදා සිටයි.

මීට පෙර සියයට 25 ක තීරුබදු පනවා තිබූ  අමෙරිකාවේ විශාලතම වෙළෙඳ හවුල්කරුවන් දෙදෙනෙකු වන කැනඩාව සහ මෙක්සිකෝවට මෙම නව තීරුබදු අදාළ වන්නේ නැහැ.

මීට අමතරව, සියලු විදේශීය නිෂ්පාදිත මෝටර් රථ සහ මෝටර් රථ අමතර උපාංග සඳහා මීට පෙර පැනවූ 25% තීරුබදු අද (03) මධ්‍යම රාත්‍රියේ සිට ක්‍රියාත්මක වේ.

කෙසේ වෙතත් අදාළ තීරුබදු පැනවීම අමෙරිකාවේ ස්වර්ණමය යුගයක ආරම්භය බව ජනාධිපති ඩොනල්ඩ් ට්‍රම්ප් සඳහන් කළේ ය.

ඔහු වැඩිදුරටත් පෙන්වා දෙන්නේ, මෙමගින් දේශීය නිෂ්පාදන ඉහළ නැංවීටත්, ස්වයංරැකියා සහ ව්‍යාපාර අවස්ථා වර්ධනය කිරීමටත් හැකියාව ලැබෙන බවයි.