රුසියානු ජනපති සහ අමෙරිකානු ජනපති අතර පැවැත්වීමට තිබූ සාකච්ඡා අත්හිටුවයි...

COLOMBO(News1st) - තමා සහ රුසියානු ජනපති ව්ලැඩ්මියර් පුටින් අතර පැවැත්වීමට සැලසුම් කළ සාකච්ඡා අත්හිටවු බව අමෙරිකානු ජනපති ඩොනල්ඩ් ට්‍රම්ප් පවසයි.

ඒ  යුක්‍රේනය සමඟ පවතින ගැටුම් නතර කිරිම සඳහා අමෙරිකාව ඉදිරිපත් කළ ඉල්ලීම රුසියාව ප්‍රතික්ෂේප කිරිම හේතුවෙනි.

අමෙරිකානු ජනාධිපති ඩොනල්ඩ් ට්‍රම්ප් ප්‍රකාශ කළේ, කාලය නාස්ති කිරිමේ හමුවීමක් සිදු කිරීමට තමාට අවශ්‍ය නොවන බවයි.

එමෙන්ම ඉදිරියේදි  තමා සහ රුසියානු ජනපති අතර හමුවක් සඳහා කිසිදු සැලැස්මක් නොමැති බව ද අමෙරිකානු ජනාධිපතිවරයා අවධාරණය කළේ ය.

රුසියානු - යුක්‍රේන සාමය වෙනුවෙන් සාකච්ඡා කිරීම සඳහා රුසියානු ජනපති සහ අමෙරිකානු ජනපති අතර හමුවක් මේ සතිය තුළ හංගේරියාවේදි සිදු කරන බව මීට පෙර නිවේදනය කර තිබුණි.

එම හමුවට පෙර අමෙරිකානු රාජ්‍ය ලේකම් මාර්කෝ රුබියෝ සහ රුසියානු විදේශ අමාත්‍ය සර්ජි ලැව්රොව් අතර එම සාකච්ඡා සූදානම් කිරීමේ හමුවක් පැවැත්වීමට නියමිතව තිබු බව සඳහන් වේ.

කෙසේ වෙතත් එම සාකච්ඡා ද අත්හිටුවා ඇතැයි විදෙස් මාධ්‍ය වාර්තා කළේ ය.