සුරේෂ් සලේ ගැන X සටහනක් තැබූ නාමල් රාජපක්ෂ

COLOMBO (News 1st) - ශ්‍රී ලංකා පොදුජන පෙරමුණේ ජාතික සංවිධායක නාමල් රාජපක්ෂ පාස්කු ප්‍රහාරය සම්බන්ධයෙන් මේ වනවිට රැඳවුම් නියෝග මත රඳවා සිටින හිටපු බුද්ධි ප්‍රධානි සුරේෂ් සලේ පිළිබඳ සිය X ගිණුමේ අදහස් දක්වා තිබේ.

උපුටා ගැනීම -

මේ වනවිට මාධ්‍ය වාර්තා මගින් අනාවරණය වන තොරතුරු සහ මේජර් ජෙනරාල් (විශ්‍රාමික) සුරේෂ් සලේ මහතාගේ නීතිඥවරයා අධිකරණය හමුවේ ඔහු රඳවාගෙන සිටින ආකාරය පිළිබඳව මතු කළ කරුණු දැඩි කනස්සල්ලට හේතුවන කරුණකි.

සුරේෂ් සලේ මහතා රඳවා සිටින්නේ මහේස්ත්‍රාත් අධිකරණයක රිමාන්ඩ් නියෝගයක් යටතේ නොව, ත්‍රස්තවාදය වැළැක්වීමේ පනත (PTA) යටතේයි. 
විශේෂයෙන්ම කැපී පෙනෙන්නේ වසර ගණනාවක් PTA පනතට එරෙහිව හඬ නැගූ බොහෝ ක්‍රියාකාරීන්ගේ නිහඬතාවයයි. ඔවුන්ගේ මෙම හදිසි නිහඬතාවය ස්ථාවරත්වය සහ මූලධර්ම පිළිබඳ බරපතල ප්‍රශ්න මතු කරයි.

අප සියලු දෙනාටම පාස්කු ඉරුදින ප්‍රහාරයේ වින්දිතයන්ට යුක්තිය ඉටු විය යුතුයි. එහෙත් එය පක්ෂග්‍රාහීත්වයෙන්, දේශපාලන බලපෑම්වලින් හෝ තෝරාගත් පිරිසකට පමණක් නීතිය ක්‍රියාත්මක කිරීමෙන් තොරව සිදුවිය යුතුයි. සත්‍යය වෙනුවට දේශපාලන අරමුණු මත පදනම් වූ පරීක්ෂණ ක්‍රියාත්මක වන්නේ නම්, එය තවමත් සැබෑ යුක්තිය බලාපොරොත්තුවන වින්දිතයන්ට සහ ඔවුන්ගේ පවුල්වලට කරන ද්‍රෝහිකමක් බවට පත්විය හැකියි.

එම කොමිෂන් සභා වාර්තාව තුළම එහි සොයාගැනීම් සහ නොසැලකිල්ල සම්බන්ධයෙන් පුද්ගලික වගකීම් දරන පුද්ගලයන් පිළිබඳව පැහැදිලිව සඳහන් කර තිබුණි. විහිළුවට මෙන්, එම සොයාගැනීම් සමග සම්බන්ධ වූ ඇතැම් පුද්ගලයන් අද එම පරීක්ෂණවලට නායකත්වය දෙමින් සිටී.

විපක්ෂය ලෙස අප පරීක්ෂණවලට විරුද්ධ නැත. වගවීම අත්‍යවශ්‍ය කරුණකි. එහෙත් දේශපාලන අරමුණු මත මෙහෙයවෙන පරීක්ෂණ කිසිදා පාස්කු ප්‍රහාරයේ වින්දිතයන්ට සැබෑ යුක්තිය ඉටු නොකරනු ඇත. ඒ පිළිබඳ මගේ ස්ථාවර අදහස එයයි.

උපුටා ගැනීම අවසන් -