දුම්රිය ස්ථානධිපති වර්ජනයෙන් මගීන් අමාරුවේ: සේවයට වාර්තා නොකළහොත් සේවය හැරගියා සේ සලකනවා - දුම්රිය සාමාන්‍යාධිකාරී

COLOMBO (News 1st) - දුම්රිය ස්ථානාධිපතිවරුන් ඇතුළු සේවකයින් පිරිසක්  ආරම්භ කළ වැඩ වර්ජනය හේතුවෙන් මේ වනවිට දුම්රිය ධාවනයට දැඩි බාධා එල්ල වී තිබේ. 

දුම්රිය ගමනාගමන අධිකාරී එන්. ජේ. ඉඳිපොලගේ මහතා සඳහන් කළේ, අද (10) උදෑසන කාර්යලයීය දුම්රිය කිහිපයක් පමණක් ධාවනය කිරීමට සැලසුම් කර ඇති බවයි. 

උසස් වීම් ලබා නොදීම ඇතුළු ගැටලු කිහිපයක් මුල් කර ගනිමින් ඔවුන් මෙම වැඩ වර්ජනය ඊයේ මධ්‍යම රාත්‍රියේ ආරම්භ කළහ. 

දුම්රිය ස්ථානාධිපතිවරුන්ගේ වැඩ වර්ජනය හේතුවෙන් ඊයේ රාත්‍රි තැපැල් දුම්රිය සියල්ල අවලංගු කිරීමට සිදු විය. 

දුම්රිය දෙපාර්තමේන්තුව සඳහන් කළේ, වර්ජන ක්‍රියාමාර්ගය හේතුවෙන් අද දිනයේදී දුම්රිය වාර ප්‍රවේශපත්‍ර හිමි මගීන්ට එම වාර ප්‍රවේශපත්‍රය උපයෝගී කරගනිමින් ලංකා ගමනාගමන මණ්ඩලට අයත් බස් රථවලින් ප්‍රවාහන පහසුකම් සලසා ගැනීමට අවශ්‍ය පහසුකම් සලසා ඇති බවයි. 

මේ අතර අද සේවයට වාර්තා නොකරන දුම්රිය ස්ථානාධිපතිවරුන් සේවය හැර ගියා සේ සලකන බව නිවේදනයක් නිකුත් කරමින් දුම්රිය සාමාන්‍යාධිකාරීවරයා පැවසීය.