ප්‍රවීණ විරිඳු සහ ජන ගී ගායන ශිල්පිනී, නර්තනාචාර්ය දයා නෙල්ලම්පිටිය අභාවප්‍රාප්ත වෙයි...

COLOMBO (News 1st) - ප්‍රවීණ විරිඳු සහ ජන ගී ගායන ශිල්පිනී, නර්තනාචාර්ය දයා නෙල්ලම්පිටිය, අභාවප්‍රාප්ත වී තිබේ.

අද (14) උදෑසන සිය නිවසේදී අභාවප්‍රාප්ත වන විට ඇගේ වයස, අවුරුදු 81 කි.

ශ්‍රී ලංකා ගුවන් විදුලි සංස්ථාවේ විශිෂ්ඨ ශ්‍රේණියේ ජන ගී ගායිකාවක වූ ඇගේ උපත සිදුවෙන්නේ, 1934 වසරේ සැප්තැම්බර් 27 වැනිදායි.

නරි බෑණා වේදිකා නාට්‍යයේ වසර 40 ක් පසුබිම් ගී ගායනා කර ඇති ඇය, "ගජමන් පුවත", "පද්මාවතී", "ජසයා සහ ලෙංචිනා" නාට්‍යවල ද ගීත ගායනා කළාය.

ප්‍රවීණ ජන ගී හා විරිඳු ගායකයෙකු වූ සේන ෆොන්සේකා සමග අතිනත ගෙන සිටි ඇය, දරුවන් තුන්දෙනෙකුගේ මවක්.

සේන - දයා යුවළ විරිඳු ගායනා නොකළ වෙසක් තොරණක්, එකල නොතිබූ තරම්.

දේහය පිළිබඳ අවසන් කටයුතු අනිද්දා (16) හවස 6 ට, කොහුවල පොදු සුසාන භූමියේදී සිදු කිරීමට නියමිතයි.

දේහය, අද පස්වරුවේ සිට මහජන ගෞරවය සඳහා කොහුවල රත්නාවලී පාරේ නො.8 නිවසේ තැන්පත් කර තැබේ.