ඕමාන මුහුදේ තෙල් නැවක් පෙරලීමෙන් ශ්‍රී ලාංකිකයින් තිදෙනෙකු ඇතුළු 16ක් අතුරුදන්...

COLOMBO (News 1st) - ඕමාන මුහුදේ දී තෙල් නැවක් පෙරලීමෙන් ශ්‍රී ලාංකිකයින් තිදෙනෙකු ඇතුළු 16 දෙනෙකු අතුරුදන්ව තිබේ. 

ඕමානයේ සමුද්‍රීය ආරක්ෂක මධ්‍යස්ථානය X පණිවුඩයක් නිකුත් කරමින් සඳහන් කළේ, අතුරුදන් වූ පිරිස අතර ඉන්දියානුවන් 13 දෙනෙකු ද වන බවයි. 

කොමරෝස් ධජය සහිත එම නෞකාව එලෙස අනතුරුට පත්ව ඇත්තේ, ඕමානයේ රාස් මද්‍රකා වරායේ සිට ගිනිකොන දෙසින් පිහිටි ඕමානයේම ඩියුකම් වරාය වෙත යාත්‍රා කරමින් තිබියදී බව විදෙස් වාර්තා සඳහන් කළේ ය. 

අතුරුදන් වූවන් සොයා මෙහෙයුම් ක්‍රියාත්මක බව ඕමානයේ සමුද්‍රීය ආරක්ෂක මධ්‍යස්ථානය පවසයි. 

මේ අතර විදේශ අමාත්‍යාංශය සඳහන් කළේ, ශ්‍රී ලංකිකයින් තිදෙනා සම්බන්ධයෙන් ඕමානයේ පිහිටි ශ්‍රී ලංකා තානාපති කාර්යාලය එරට රජය සමග සම්බන්ධ වී සොයා බලමින් සිටින බවයි.