ජනපතිවරණය නිදහස්, සාධාරණ හා විශ්වසනීයභාවයෙන් පැවැත්වීමට සූදානම්.... මැතිවරණ කොමිසමෙන් සහතිකයක්..

COLOMBO (News 1st) - ජනාධිපතිවරයා තෝරා පත් කර ගැනීමේ ඡන්ද විමසීම, නිදහස්, සාධාරණ හා විශ්වසනීයභාවයෙන් යුතුව පැවැත්විම සඳහා සියලු විධි විධාන යොදා ඇතැයි ජාතික මැතිවරණ කොමිෂන් සභාව පවසයි.

එහි සභාපති ආර්.එම්.ඒ.එල්.රත්නායක මහතා නිකුත් කළ නිවේදනයක දැක්වෙන්නේ ඊට අදාලව ව්‍යවස්ථාපිතව කළ යුතු කාර්යයන් පිළිබඳ චක්‍රලේඛ, උපදෙස්, නියෝග කොට ඇති අතර ඒ සම්බන්ධයෙන් මහජනතාව දැනුවත් කර ඇති බවයි.

කෙසේ වෙතත් කොමිෂන් සභාවේ වර්තමාන උපදෙස්වලට පරිබාහිරව විවිධ පුද්ගලයින් හා සංවිධාන, ඡන්ද විමසීම් ක්‍රියාවලියට අදාලව එනම්, සලකුණු කරන ආකාරය, මනාප ගණන් කරන ආකාරය,  මැතිවරණ නීති බලාත්මක කිරීම, ප්‍රචාරණ කටයුතු හා වෙනත් පරිපාලනමය කාර්යයන් සම්බන්ධයෙන් වරින්වර කරනු ලබන ප්‍රකාශ හා මත, ප්‍රචාරය වන බවට නිරීක්ෂණය වන බව එහි දැක්වෙයි.

ඒවා මැතිවරණ කොමිෂන් සභාවේ නිල නිවේදන නොවන බවත් එවැනි කිසිදු ප්‍රකාශයක, නිල වලංගුතාවක් නොමැති බවත් ඒ සම්බන්ධයෙන් වගකීමක් නොමැති බවත් මැතිවරණ කොමිසමේ සභාපතිවරයා අවධාරණය කළේ ය.