ඉරානයේ විශාලතම පාලම විනාශ කිරීමෙන් පසු ට්‍රම්ප්ගෙන් අනතුරු ඇඟවීමක්: "ගනුදෙනුවකට එළඹීමට කාලයයි"

COLOMBO(News1st) - ඉරානයේ කරාජ් (Karaj) හි පිහිටි එරට උසම සහ වැදගත්ම යටිතල පහසුකම් ව්‍යාපෘතියක් වන B1 පාලම ගුවන් ප්‍රහාරයකින් විනාශ කිරීමෙන් අනතුරුව, ජනපති ඩොනල්ඩ් ට්‍රම්ප් ටෙහෙරානයට දැඩි අනතුරු ඇඟවීමක් කර තිබේ.

පාලම කඩා වැටෙන දර්ශන සිය Truth Social ගිණුම ඔස්සේ ප්‍රසිද්ධ කරමින් ජනාධිපතිවරයා ප්‍රකාශ කළේ,

"ඉරානයේ විශාලතම පාලම බිමට සමතලා විය, එය නැවත කිසිදා භාවිතා කළ නොහැක! තවත් බොහෝ දේ ඉදිරියට සිදුවනු ඇත!" යනුවෙනි.

වහාම සාකච්ඡා මේසයට පැමිණෙන ලෙස ඉරාන නායකත්වයෙන් ඉල්ලා සිටි ඔහු වැඩිදුරටත් මෙසේ පැවසීය:

"ප්‍රබල රටක් ලෙස පැවතීමට නම් ඉතිරි දේත් විනාශ වීමට පෙර, ප්‍රමාද නොවී ගනුදෙනුවකට එළඹීමට දැන් කාලයයි!"

ඇමරිකානු නිලධාරීන් පවසන්නේ ඉරාන විප්ලවීය ආරක්ෂක බලකාය (IRGC) විසින් මිසයිල සහ ඩ්‍රෝන උපාංග ප්‍රවාහනය කිරීම සඳහා මෙම පාලම ප්‍රධාන සැපයුම් මාර්ගයක් ලෙස භාවිතා කළ බවයි.

ඉරාන රාජ්‍ය මාධ්‍ය වාර්තා කරන පරිදි මෙම ප්‍රහාරයෙන් පුද්ගලයින් 8 දෙනෙකු මියගොස් තවත් බොහෝ පිරිසක් තුවාල ලබා ඇත.