ට්‍රම්ප් පරිපාලනයේ තවත් ප්‍රබල වෙනසක්: ඇමරිකානු නීතිපතිනි පෑම් බොන්ඩි ධුරයෙන් ඉවත් කෙරේ!

COLOMBO(news1st) - ඇමරිකානු ජනපති ඩොනල්ඩ් ට්‍රම්ප් විසින් එරට නීතිපතිනි පෑම් බොන්ඩි (Pam Bondi) වහාම ක්‍රියාත්මක වන පරිදි ධුරයෙන් ඉවත් කර තිබේ. 

මෙය ගතවූ මාසයක කාලය තුළ ට්‍රම්ප් පරිපාලනයේ සිදුවූ දෙවන ප්‍රධානතම කැබිනට් මට්ටමේ වෙනස් කිරීම ලෙස සැලකේ.

ජනාධිපති ට්‍රම්ප් සිය 'Truth Social' ගිණුම ඔස්සේ මෙම තීරණය තහවුරු කර ඇති අතර, ඇය පෞද්ගලික අංශයේ ඉහළ තනතුරකට යොමුවනු ඇති බව සඳහන් කර ඇත.

විදෙස් මාධ්‍ය වාර්තා කරන පරිදි, මෙම හදිසි ඉවත් කිරීමට ප්‍රධානතම හේතුව වී ඇත්තේ ලිංගික අපරාධ චෝදනා ලැබ සිටින ප්‍රකට මූල්‍යකරුවෙකු වන ජෙෆ්රි එප්ස්ටයින්ට (Jeffrey Epstein) අදාළ රහසිගත ලිපිගොනු සම්බන්ධයෙන් පෑම් බොන්ඩි කටයුතු කළ ආකාරය පිළිබඳව ජනාධිපතිවරයා තුළ ඇති වූ දැඩි අප්‍රසාදයයි. විශේෂයෙන්ම එප්ස්ටයින්ගේ "ගනුදෙනුකරුවන්ගේ ලැයිස්තුව" ප්‍රසිද්ධ කිරීම සම්බන්ධයෙන් ඇයට දැඩි විවේචන එල්ල විය.

පෑම් බොන්ඩිගේ ඉවත් වීමෙන් පසු පුරප්පාඩු වූ නීතිපති ධුරයේ වැඩ බැලීම සඳහා ජනාධිපති ට්‍රම්ප් විසින් නියෝජ්‍ය නීතිපති ටොඩ් බ්ලැන්ච් (Todd Blanche) පත් කර ඇත. ටොඩ් බ්ලැන්ච් මීට පෙර ඩොනල්ඩ් ට්‍රම්ප්ගේ පෞද්ගලික නීතිඥයෙකු ලෙස ද කටයුතු කර තිබේ.

එමෙන්ම ස්ථිර නීතිපති ධුරය සඳහා වත්මන් පරිසර ආරක්ෂණ ඒජන්සියේ (EPA) ප්‍රධානී ලී සෙල්ඩින් (Lee Zeldin) පත් කිරීමට බොහෝ දුරට ඉඩ ඇති බව ද ඇමරිකානු දේශපාලන ආරංචි මාර්ග පවසයි.

පසුගියදා ආරක්ෂක ලේකම් ක්‍රිස්ටි නොයෙම් (Kristi Noem) ධුරයෙන් ඉවත් කිරීමෙන් පසු සිදුවූ මෙම දෙවන ඉවත් කිරීමත් සමඟ ඇමරිකානු දේශපාලන කරළිය තුළ ට්‍රම්ප් පරිපාලන පිළිබඳ දැඩි කතාබහක් නිර්මාණය වී තිබේ.