චීන ජනපති සහ ඇමරිකානු ජනපතිගේ බීජිං සමුළුව ගැන චීන විදේශ ඇමතිගෙන් විශේෂ ප්‍රකාශයක්!

COLOMBO(News1st) - චීන ජනපති සහ ඇමරිකානු ජනපතිගේ බීජිං සමුළුව ගැන චීන විදේශ ඇමතිගෙන් විශේෂ ප්‍රකාශයක්!

චීන ජනපති ෂී ජින්පින් සහ ඇමරිකානු ජනපති ඩොනල්ඩ් ට්‍රම්ප් අතර බීජිං නුවරදී පැවැත්වුණු ඓතිහාසික සමුළුව, ගෝලීය ස්ථාවරත්වය උදෙසා නව මාවතක් විවර කර ඇති බව චීන විදේශ අමාත්‍ය වං යී පවසයි.

විදේශ අමාත්‍යවරයා පෙන්වා දෙන්නේ දෙරටේ නායකයින් අතර පැය 9කට ආසන්න කාලයක් පැවැති මෙම සාකච්ඡා අතිශය විවෘත, ඵලදායී සහ උපායමාර්ගික වැදගත්කමකින් යුක්ත වූ බවයි.

මෙම ඓතිහාසික හමුව සම්බන්ධයෙන් චීන විදේශ අමාත්‍යවරයා කරුණු දැක්වූ ප්‍රධාන ක්ෂේත්‍ර මෙසේය:

1. “උපායමාර්ගික ස්ථාවරත්වයක් සහිත නිර්මාණාත්මක සබඳතාවක්”

මෙම සමුළුවේ ප්‍රධානතම දේශපාලන එකඟතාව වන්නේ දෙරට අතර "උපායමාර්ගික ස්ථාවරත්වයක් සහිත නිර්මාණාත්මක චීන-අමෙරිකානු සබඳතාවක්" (A constructive China-U.S. relationship of strategic stability) ගොඩනැඟීමයි.

එහිදී මූලිකාංග 4ක් කෙරෙහි අවධානය යොමු කර ඇත:

ධනාත්මක ස්ථාවරත්වය:

සහයෝගීතාවය පෙරදැරි කරගනිමින් සබඳතා ශක්තිමත් කිරීම.

නිරෝගී ස්ථාවරත්වය:

දෙරට අතර තරගකාරිත්වය "බිංදුවේ ක්‍රීඩාවක්" (Zero-sum game) බවට පත් නොකර, සාධාරණ නීතිරීති මත සිදුකිරීම.

නිරන්තර ස්ථාවරත්වය:

 මතභේද කළමනාකරණය කරගනිමින්, සබඳතා අස්ථාවර වීමට ඉඩ නොදීම.

තිරසාර ස්ථාවරත්වය: 

යුද්ධ සහ ගැටුම් ප්‍රතික්ෂේප කරමින් සාමකාමී සහජීවනය තහවුරු කිරීම.

2. තායිවාන අර්බුදය සහ අමෙරිකාවේ ස්ථාවරය

තායිවාන ප්‍රශ්නය චීනයේ අභ්‍යන්තර කටයුත්තක් බවත්, චීනය සම්පූර්ණයෙන්ම යළි ඒකාබද්ධ කිරීම සමස්ත චීන ජනතාවගේම ඓතිහාසික අභිලාෂය බවත් විදේශ අමාත්‍යවරයා අවධාරණය කළේය. "තායිවාන නිදහස්වාදය" සහ සාමය යනු ගින්දර සහ ජලය මෙන් එකිනෙකට ප්‍රතිවිරුද්ධ කාරණා දෙකක් බව මෙහිදී සාකච්ඡා වී ඇත. චීනයේ මෙම ස්ථාවරය සහ අවධානය ඇමරිකානු පාර්ශවය වටහාගෙන ඇති බවත්, ඔවුන් තායිවානයේ ස්වාධීනත්වයට සහය නොදක්වන බවත් වං යී ප්‍රකාශ කළේය.

3. වෙළඳ සහ ආර්ථික එකඟතා

දෙරටේ ආර්ථික කණ්ඩායම් අතර පැවැති සාකච්ඡාවලින් සාධනීය ප්‍රතිඵල ලැබී තිබේ.
ඒ අනුව, ආයෝජන සහ වෙළඳ මණ්ඩල (Board of Trade and Board of Investment) පිහිටුවීමටත්, කෘෂිකාර්මික නිෂ්පාදන සඳහා වෙළඳපල ප්‍රවේශය පුළුල් කිරීමටත්, අන්‍යෝන්‍ය තීරුබදු අඩු කිරීමේ රාමුව යටතේ ද්විපාර්ශ්වික වෙළඳාම ඉහළ නැංවීමටත් නායකයින් එකඟ වී ඇත.

4. මැදපෙරදිග සහ යුක්රේන අර්බුදය

මැදපෙරදිග තත්ත්වය: බලය භාවිත කිරීමෙන් ගැටලු විසඳිය නොහැකි බවත්, අමෙරිකාව සහ ඉරානය සාකච්ඡා මාර්ගයෙන් ගැටලු විසඳාගත යුතු බවත් චීනය අවධාරණය කරයි. විශේෂයෙන්ම, ස්ථිර සටන් නැවැත්වීමක් හරහා 'හෝමුස් සමුද්‍ර සන්ධිය' (Strait of Hormuz) කඩිනමින් නැවත විවෘත කිරීමේ අවශ්‍යතාව චීන ජනාධිපතිවරයා පෙන්වා දී ඇත.

යුක්රේන අර්බුදය: 

ගැටුම කඩිනමින් අවසන් කිරීම දෙපාර්ශවයේම අපේක්ෂාව වන අතර, අර්බුදයට දේශපාලන විසඳුමක් සෙවීම සඳහා චීනය සහ අමෙරිකාව අඛණ්ඩව සන්නිවේදනය පවත්වා ගැනීමට තීරණය කර තිබේ

5. රාජ්‍ය තාන්ත්‍රික සබඳතා සහ ජනතා සබඳතා 

චීන - අමෙරිකානු සබඳතාවල අනාගතය තීරණය වන්නේ තාරුණ්‍යය මත බැවින්, ඉදිරි වසර 5 තුළ තරුණ අමෙරිකානුවන් 50,000කට චීනයේ අධ්‍යයන සහ හුවමාරු වැඩසටහන් සඳහා ආරාධනා කිරීමට චීන ජනාධිපතිවරයා පියවර ගෙන ඇත.

එමෙන්ම, එළඹෙන සරත් සෘතුවේදී (This Fall) ජනාධිපති ඩොනල්ඩ් ට්‍රම්ප්ගේ ආරාධනයකට අනුව චීන ජනාධිපති ෂී ජින්පින් අමෙරිකාවේ නිල රාජ්‍ය සංචාරයක නිරත වීමටද නියමිතය.

චීන විදේශ අමාත්‍යවරයා වැඩිදුරටත් සඳහන් කළේ, චීන ජාතියේ මහා පුනරුදය (Great Rejuvenation of the Chinese Nation) සහ අමෙරිකාව නැවත ශ්‍රේෂ්ඨ කිරීම (Making America Great Again) යන අරමුණු දෙක එකිනෙකාට බාධාවක් නොවන බවත්, ලෝක සාමය වෙනුවෙන් දෙරටටම එක්ව කටයුතු කළ හැකි බවත් මෙම සමුළුවෙන් ඔප්පු වී ඇති බවයි.