ABU 63 වැනි මහා සමුළුවට එක්වූ ජාත්‍යන්තර නියෝජිතයින් අද මෙරට විශේෂ ස්ථාන කිහිපයක සංචාරයක

COLOMBO(News1st) - ලොව විශාලතම මාධ්‍ය සංසදය වන, ආසියා - ශාන්තිකර කලාපීය විද්‍යුත් විකාශකයින්ගේ සංගමය හෙවත් ABUහී 63 වැනි මහා සමුළුවට එක්වූ ජාත්‍යන්තර නියෝජිතයින් අද මෙරට සුන්දරත්වය හා පෞඩ ඉතිහාසයේ සාක්ෂි සියැසින් දැක බලා ගැනීමට නියමිතයි.

ඒ අනුව, ආසියා - ශාන්තිකර කලාපීය විද්‍යුත් විකාශකයින්ගේ සංගමයට අයත් රටවල් 66 ක, විද්‍යුත් මාධ්‍ය ආයතන 225 ක නියෝජිතයන් අද මෙරට විශේෂ ස්ථාන කිහිපයක සංචාරයක නිරත වනු ඇති.

ඒ හරහා ශ්‍රී ලංකාව පිළිබඳ ජාත්‍යන්තර සංචාරකයන්ට තවත් වැදගත් පණිවිඩ රැසක් යොමු කිරීමේ හැකියාව පවතිනවා.

මේ අතර ලොව විශාලතම මාධ්‍ය සංසදය වන, ආසියා ශාන්තිකර කලාපීය විද්‍යුත් විකාශකයින්ගේ සංගමයේ 15 වැනි සංගීත ප්‍රසංගය ඊයේ රාත්‍රියේ පැවැත්වුණේ රත්මලාන ස්ටයින් ස්ටුඩියෝස්හිදියි.

කලාපයේ ප්‍රවීණ කලාකරුවන් රැසකගේ සහභාගීත්වයෙන් එම සංගීත ප්‍රසංගය පැවැත්වුණා.

ආසියා - පැසිෆික් කලාපයේ විවිධ රටවලින් පැමිණි විදේශීය නියෝජිතයන්ට කලාපයේ මෙන්ම මෙරට කලාත්මක අනන්‍යතාවය, සංගීතය සහ සංස්කෘතිය අත්විඳීමට සැලැස්වීම එම සංගීත ප්‍රසංගයේ ප්‍රධාන අරමුණයි.