රාමසාන් උත්සවය අදයි..

COLOMBO (News 1st) –ඉස්ලාමීය බැතිමතුන් අද ඊදුල් ෆිතර් හෙවත් රාමසාන් උත්සවය සමරයි.

රාමලාන් යන්නෙහි තේරුම භාග්‍යවත් මාසය යන්නයි.

පුරා මාසයක් දිනපතා හිරු නැගෙන්නට පෙර සිට, හිරු බැස යන තුරු නිරාහාරව සිටිමින් ඉස්ලාම් බැතිමතුන් උපවාසයේ නිරත විය.

එය, අනෙකාගේ  කුසගින්න, දුක සහ අවශ්‍යතා තේරුම් ගන්නා කාලයකි.

එම කාලයේ සකාත් හෙවත් දන්දීම් වැඩි වශයෙන් කළ යුතුයි.

ඉස්ලාම් බැතිමතුන්ගේ ශුද්ධ ග්‍රන්ථය වන අල් කුරාණය දෙවියන් වහන්සේගෙන් මුහම්මද්තුමාට මුලික හෙළිදරව් කිරීම් ලැබුණු මාසය ලෙස, අද රාමසාන් සමරයි.

නිදහස, සමානාත්මතාව, සාමුහිකත්වය සහ මානව ගරුත්වය රජයන සමාජයක් ගොඩනැගීමට තබන පියවරේදී  ඉස්ලාම් දහම තුළ වන ඉගැන්වීම් පරමාදර්ශයක් වනු ඇතැයි විශ්වාස කරන බව, ජනාධිපති අනුර කුමාර දිසානායක මහතා පවසයි.

ඒ, රාමසාන් උත්සවය වෙනුවෙන් සුබ පැතුම් පණිවුඩයක් නිකුත් කරමින් ය.

සහජීවනය, ඉවසීම, යුක්තිය සහ සාමය අරමුණු කොටගෙන කටයුතු කිරීමේ අවශ්‍යතාවය රාමසාන් උත්සවයෙන් අවබෝධ කරදෙන බව, අග්‍රාමාත්‍ය ආචාර්ය හරිනි අමරසූරිය නිකුත් කළ සුබ පැතුම් පණිවුඩයේ දැක්වෙයි.

විපක්ෂ නායක සජිත් ප්‍රේමදාස මහතා සුබ පැතුම් පණිවුඩයක් නිකුත් කරමින් පෙන්වා දෙන්නේ, තමා ගැන පමණක් නොව අනෙකා ගැන ද සිතා කටයුතු කිරීමෙන් සැවොම සෞභාග්‍යයක් කරා ගෙයාමට සියලු දෙනා එකාවන්ව කටයුතු කළ යුතු බවයි.