වැලිගම ප්‍රදේශීය සභා සභාපති ඝාතනය සම්බන්ධයෙන් අත්අඩංගුවට ගත් වෙඩික්කරු ඇතුළු සැකකරුවන් වැඩිදුර විමර්ශන සඳහා මූල්‍ය අපරාධ විමර්ශන කොට්ඨාසය වෙත...

COLOMBO (News1st) - වැලිගම සභාපති ඝාතනයේ වෙඩික්කරු ඇතුළු සැකකරුවන් පිරිස වැඩිදුර විමර්ශන සඳහා මූල්‍ය අපරාධ විමර්ශන කොට්ඨාශ වෙත භාරදී ඇති තිබේ.

එම ඝාතනයට සම්බන්ධ මූලික විමර්ශන ජෙෂ්‍ය්ඨ නියෝජ්‍ය පොලිස්පති දකුණු පළාත මගින් සිදුකල අතර ඉදිරි විමර්ශන කටයුතු මූල්‍ය අපරාධ විමර්ශන කොට්ඨාශය විසින් සිදුකරනු ඇති.

වැලිගම සභාපති ඝාතනය පිළිබඳ විමර්ශන සඳහා පොලිස්පතිවරයාගේ පූර්ණ අධීක්ෂණය කණ්ඩායම් 10 ක් යොදවා ඇතැයි පොලිසිය සඳහන් කළේ ය.

පොලීසිය පැවසුවේ, ඒ සඳහා ජ්‍යෙෂ්ඨ නියෝජ්‍ය පොලිස්පති දකුණු පළාත, ජ්‍යෙෂ්ඨ නියෝජ්‍ය පොලිස්පති බස්නාහිර පළාත, ජ්‍යෙෂ්ඨ නියෝජ්‍ය පොලිස්පති අපරාධ පරීක්ෂණ දෙපාර්තමේන්තුව, රාජ්‍ය බුද්ධි සේවය, අණ දෙණ නිළධාරි පොලිස් විශේෂ කාර්ය බලකාය, නියෝජ්‍ය පොලිස්පති කොළඹ දිසාව, නියෝජ්‍ය පොලිස්පති බස්නාහිර පළාත දකුණ, අධ්‍යක්ෂ මූල්‍ය අපරාධ විමර්ශන කොට්ඨාශය, අධ්‍යක්ෂ අපරාධ වාර්තා කොට්ඨාශය හා අධ්‍යක්ෂ දක්ෂිණ අධිවේගී මාර්ග සංචාරක කොට්ඨාශ මගින් ඒකාබද්ධව එම කටයුතු සිදුකරන බවයි.

අනුරාධපුර කැකිරාව ප්‍රදේශයේදී  ඊයේ අළුයම සැකකරුවන් දෙදෙනෙකු හා සැකකාරියක් අත්අඩංගුවට ගත් අතර එහිදී පලාගිය වෙඩික්කරු මහරගම නාවින්න ප්‍රදේශයේදී අත් අඩංගුවට ගනු ලැබුවේ විශේෂ විමර්ශන කණ්ඩායමක් විසින් ය.

එම සැකකරුවන් අත් අඩංගුවට ගැනීම සඳහා පොලිස් විශේෂ කාර්ය බලකාය, රාජ්‍ය බුද්ධි සේවයේ නිළධාරින් හා ප්‍රාදේශීය පොලිස් නිළධාරින් කණ්ඩායමක් ඒකාබද්ධ මෙහෙයුමක් ක්‍රියාත්මක කර තිබුණි.

පොලිසිය පැවසුවේ,  සැකකරුවන් අපරාධය සදහා භාවිතා කරන ලද එක් යතුරුපැදියක්ද පොලිස් භාරයට ගෙන ඇති අතර, වැටලීම සිදුකරන අවස්ථාවේදී සැකකරුවන් සතුව තිබූ රුපියල් ලක්ෂ 12 කට අධික මුදලක් , මෙන්ම හොරොයින් හා අයිස් මත්ද්‍රව්‍ය හා මත්ද්‍රව්‍ය භාවිතායට යොදා ගන්නා උපකරණද සිය භාරයට ගෙන ඇති බවයි.

පසුගිය 22 වැනිදා වැලිගම ප්‍රාදේශීය සභාවේ සභාපති ලසන්ත වික්‍රමසේකර මහතාව නාඳුනන වෙඩික්කරුවෙකු විසින් වෙඩි තබා ඝාතනය කරනු ලැබුවේ ය.