ශ්‍රී ලංකාවට 210’ වර්ගයේ මධ්‍යම ප්‍රමාණයේ වෙරළාරක්ෂක නෞකාවක්..

COLOMBO (News 1st) - අම‍ෙරිකා එක්සත් ජනපදය ශ්‍රී ලංකා නාවික හමුදාවට 4 වන එක්සත් ජනපද වෙරළාරක්ෂක නෞකාව පරිත්‍යාග කර තිබේ.
එය 210’ වර්ගයේ මධ්‍යම ප්‍රමාණයේ වෙරළාරක්ෂක නෞකාවක් වේ.
මෙම නෞකාව පරිත්‍යාග කිරීමේ උත්සවය 2025 දෙසැම්බර් 2 වන දින මේරිලන්ඩ් හි බැල්ටිමෝර් නගරයේ එක්සත් ජනපද වෙරළාරක්ෂක අංගනයේදී පැවැත්විණි.
4 වන එක්සත් ජනපද වෙරළාරක්ෂක නෞකාව පරිත්‍යාග කිරීම ශ්‍රී ලංකාව සහ අම‍ෙරිකා එක්සත් ජනපදය අතර පවතින විශිෂ්ට ද්විපාර්ශ්වික සබඳතා සහ සෙවීම් සහ ගලවා ගැනීමේ සහ ආපදා ප්‍රතිචාර දැක්වීමේ ක්ෂේත්‍රයේ සමුද්‍රීය නිරීක්ෂණ, සාමය සහ ආරක්ෂාව, පුහුණුව සහ ධාරිතා වර්ධනය සහ ඉන්දු-පැසිෆික් කලාපයේ නාවික නිදහස සහතික කිරීම සඳහා එක්ව කටයුතු කිරීම පෙන්නුම් කරන අවස්ථාවක් විය.
ශ්‍රී ලංකාවේ මෑතකදී ඇති වූ ගංවතුර විනාශය අතරතුර ශ්‍රී ලංකාවේ ජනතාවට ආධාර ඉල්ලා සිටි අවස්ථාවේ අවශ්‍ය සහාය ලබාදීම සඳහා ඉදිරිපත්වූ පළමු රටවලින් එකක් වන්නේ එක්සත් ජනපදයයි. 
මෙම අවස්ථාව සඳහා එක්සත් ජනපද පාර්ශවය නියෝජනය කරමින් OSW, දකුණු සහ අග්නිදිග ආසියාව සඳහා වන නියෝජ්‍ය සහකාර යුද ලේකම් Andrew Byers, දකුණු සහ මධ්‍යම ආසියානු කාර්යාංශය සඳහා වන නියෝජ්‍ය සහකාර රාජ්‍ය ලේකම් Bethany Morrison, DOS PM, NIPO හි කලාපීය ආරක්ෂාව සඳහා වන නියෝජ්‍ය සහකාර රාජ්‍ය ලේකම් Greg Hermsmeyer, MTNG හි විධායක අධ්‍යක්ෂ Bill Carty මහතා, සහකාර ජෙනරාල් බ්‍රිගේඩියර් ජෙනරාල් Trenton Gibson යන මහත්වරු සහභාගී වූහ.
තවද මේ උත්සවය සඳහා අම‍ෙරිකා එක්සත් ජනපදයේ ශ්‍රී ලංකා තානාපති මහින්ද සමරසිංහ, ශ්‍රී ලංකා නාවික හමුදාපති වයිස් අද්මිරාල් බී.ඒ.කේ.එස්.පී. බානගොඩ, RSP, USP, ndc, psc, තානාපති කාර්යාලයේ ආරක්ෂක උපදේශක කොමදෝරු දුමිඳු අබේවික්‍රම, අණදෙන නිලධාරී සහ 4 වන වෙරළාරක්ෂක නෞකාවේ කාර්ය මණ්ඩලය සම්බන්ධ වී ඇත.