මහනුවර දිස්ත්‍රික් ලේකම් කාර්යාලය ආශ්‍රිත සෝදිසි මෙහෙයුම් අවසන්.. වැඩිදුර විමර්ශන CCID යට..

COLOMBO (News 1st) - මහනුවර දිස්ත්‍රික් ලේකම් කාර්යාලය ආශ්‍රිත සෝදිසි මෙහෙයුම් අවසන් කර තිබේ.

එහි තිබී කිසිදු පුපුරණ ද්‍රව්‍යයක් හමු නොවූ බව පොලීසිය පැවසුවේ ය.

මහනුවර දිස්ත්‍රික් ලේකම් කාර්යාලය ආශ්‍රිතව ඊයේ (26) සෝදිසි මෙහෙයුමක් ක්‍රියාතක්මක වූයේ ස්ථාන පහක බෝම්බ සඟවා ඇති බවට, දිස්ත්‍රික් ලේකම්වරයාගේ ඊමේල් ගිණුමට පණිවුඩයක් ලැබීමත් සමගය.

සෝදිසි මෙහෙයුම සඳහා පොලිස් නිල සුනඛ කොට්ඨාසය, පොලිස් විශේෂ කාර්ය බලකා බෝම්බ නිෂ්ක්‍රීය අංශය හා යුද හමුදා බෝම්බ නිෂ්ක්‍රීය අංශය ද යොදාගෙන තිබුණි.

මේ අතර බෝම්බ බියක් ඇතිකරමින් ලැබී තිබූ එම ව්‍යාජ ඊමේල් පණිවුඩයට අදාල විමර්ශන පොලිස් පරිගණක අපරාධ විමර්ශන අංශයට භාරදී ඇතැයි පොලීසිය සඳහන් කරන ලදි.